Nhar il-Ħamis 25 ta’ Jannar 2007, jum l-anniversarju tat-twaqqif tal-Parroċċa tagħna, iltqajna flimkien ħdejn ir-Roundabout ta’ Fleur-de-Lys biex fl-okkażjoni ta’ l-Ordinazzjoni Episkopali, kif ukoll f’għeluq sninu, tajna merħba lill-għażiż Arċisqof tagħna, Mons. Pawlu Cremona.   L-Arċisqof għadda minn Fleur-de-Lys waqt li kien fi triqtu lejn l-Imdina fejn kellha ssir Velja ta’ Talb lejlet l-Ordinazzjoni Episkopali tiegħu.   Fejn ir-roundabout ta’ Fleur-de-Lys, il-Kumitat Festi Esterni, armaw l-istatwa tal-Madonna tal-Karmnu li toħroġ mal-marċ il-Ħamis, fil-ġimgħa tal-festa. Armaw ukoll apparat tas-sound biex jakkumpanja l-ġemgħa fl-istennija ta’ l-Arċisqof.   Għall-istess okkażżjoni gew imħejjija mkatar ta’ diversi lwien biex ikomplu joħolqu atmosfera sabiħa. Grupp li kien qiegħed jgħin biex tinħoloq arja ta’ ferħ, mexxa l-kant kif ukoll kanta Happy Birthday mal-wasla tiegħu.   Hekk kif wasal l-Arċisqof, il-Kappillan ippreżentalu bukkett fjuri u nkwatru b’tifkira ta’ din il-ġrajja. Flimkien ma’ din it-tifkira, ġiet ippreżentata ukoll kartolina li kien fiha poeżija miktuba minn Charles Mifsud f’isem il-poplu ta’ Fleur-de-Lys.