Fleur-de-Lys huwa raħal żgħir bejn Birkirkara, Santa Venera u Ħal Qormi u bħala lokalita m’għandux Kunsill Lokali għalkemm għandu ‘l fuq minn 3,000 ruħ. Il-lokalita hi mibnija madwar triq Fleur-de-Lys fejn hemm ukoll il-Knisja parrokjali.   Dan ir-raħal ħa ismu mit-Tliet Arkati li kien hemm fl-inħawi fejn illum hemm ir-Roundabout. Dawn l-arkati kienu jgħaqqdu l-akwedott li Adrian de Wignacourt bena mill-1615.   Fleur-de-Lys beda jieħu forma lejn in-nofs tas-seklu għoxrin. Kien hekk li 1944 inxtrat l-art biex tinbena knisja ġdida. Din infetħet fl-1947 u fl-1949 inqgħatet għalija mill-komunita ta’ Santa Venera.   Fis-snin sebgħin Fleur-de-Lys beda jieħu forma ta’ raħal u nħass il-ħtieġa li Fleur-de-Lys jkollu parroċċa għalija. Fil-25 ta’ Jannar 1975 Fleur-de-Lys saret parroċċa fejn l-ewwel kappillan u pirjol kien Patri Amadeo Zammit O.Carm.   Barra l-knisja parrokjali, il-parroċċa għandha ukoll Ċentru parrokjali, iċ-Ċentru Familja Karmelitana. Dan inbena fil-bidu tas-snin disgħin u ġie kummissjonat minn Patri Tony Parnis O.Carm, li ħallina fl-2002.   Illum Fleur-de-Lys huwa raħal imdaqqas b’żewġ banek u ħwienet ta’ kull tip. Peress li Fleur-de-Lys żgħir m’hemmx ħafna bini prominenti ħlief l-akkwedott li ġie rrestawrat fis-sena 2005/6 u l-Head Office tal-Bank Of Valletta.